වාසනා මෙලොවට බිහිකළ අම්මා ගල්කිස්ස සුමනාරාම පාරේ අංක 19/1 ඩබ්ලිව්.ඒ.ඩී.පෙරේරා මහතා බාරේ පදිංචිව සිටි හප්පාවන විතානවසම්ගේ නයනා ඩයස් යනුවෙන් ඇයගේ උප්පැන්න සහතිකයේ සදහන් කර තිබේ. මව ඉපැදී ඇත්තේ ගාල්ලේය. වාසනා ලැබෙන විට අගේ වයස අවුරුදු 20කි. දෙහිවල අතිරේක දිස්ත්‍රික් රෙජිස්ටාර් කේ.එම්.දමයන්ති මහත්මිය උපත ලියාපදිංචි කර ඇත. උපත දැනුම් දී ඇත්තේ ද වාසනාගේ මව විසින්ය.
වාසනා ඉපදී මාසයක පසු ඇගේ මව ඕලන්දයේ පදිංචි යුවලකට දරුකමට හදා ගැනීමට වාසනා බාර දී තිබේ. සාම විනිසුරුවරයකු ඉදිරිපිට අස්සන් තබන ලද ලියවිල්ලක් මත එම කරුණු සිදුව ඇත.
ඒ අනුව වාසනා එතැන්සිට වාසනා ජැන්සන් විය. ඇය හදා වඩා ගත් මාපියන් යුවල ජොහැන්නස් ඇන්ටෝනියස් ගොඩේ ප්‍රීඩස් ජැන්සන් සහ මාරී ජොහාන් කොර්නේලියා ජෙරාඩ්‍රස් පීමස් ලෙස හැදින්වේ.
වාසනා මේ වන විට ශ්‍රී ලංකාවට පැමිණ සිටින්නීය. ඒ තනිවම නොවේ. ඕලන්දයේ ඇගේ පෙම්වතාද සමගය.
ඇය දැන් ඇගේ ඇත්ත අම්මා සොයා වෙහෙසෙනීය. උප්පැන්න සහතිකය සදහන් ලිපිනය හැරුණ විට ඇයට ලැබුණු බොහෝ තොරතුරු මත කොළඹ තදාසන්න ප්‍රදේශ කිහිපයකටම පසුගිය දිනවල ඇය පාරක් තොටක් ගානේ සිය මව සොයා ඇත.
මීට වසරකට පෙරද ඇය ලංකාවට පැමිණ මේ ආකාරයටම සොයා බැලු නමුදු ඇයට සිය මව හමුවී නැත.
ඒ නිසාම ඇය මෙවර සිය උත්සහය අත් නොහැර ලංකාදීප කාර්යාලයට පැමිණ ඇයට උපකාරී වන ලෙස ඉල්ලා සිටියාය.
සිය පෙම්වතා සමග ලබන ජුලි මාස 11 වැනිදා වනතුරු ශ්‍රී ලංකවේ රැදී සිටින බව ඇය අප සමග කිවාය.
ඒ අතරතුර කාලයේ ඇයට සිය මව ගැන යම් තොරතුරක් දිය හැකි අයෙක් වෙතොත් කාන්ති තබ්බෝවිල, 311 වීර මාවත දෙපානම, පන්නිපිටිය යන ලිපිනයට හෝ 076 6940038 දුරකතන අමතා දැනුම් දෙන ලෙස වාසනා ඉල්ලා සිටින්නීය.
-http://www.lankadeepa.lk/-
ඡායාරූපය විශ්ව ගැමුණු ප්‍රියංකර
